.. اضرب واهرب ..
*** بشر الرئيس التركي رجب أوردغان بإهداء الشعب السوداني كمية من القمح الروسي فهل يا ترى سمعت حكومة السودان بتلك الهدية لكي تسهل الإجراءات ؟؟ ( جايز )
*** أحرز الأمل هدفاً ولم يحرز الفلاح .. ونقاط المباراة الثلاثة بقيت بعطبرة ولم تخرج منها
( وعطبراويون والأجر على الله )
*** لعب الهلال لنفسه وانتصر لجمهوره وإحساس المريخاب أن الهلال أخذ الثأر للمريخ من الرابطة كوستي ( ليس في محلو ) وهذا ما لزم التنويه
*** سنوات وسنوات والحديث يدور عن ( المكننة الزراعية ) أعقبه منذ فترة الحديث عن ( التقنية الزراعية ) ولا زالت الطورية والواسوق ( عدة الشغل ) مع مساعدة من التراكتورات القديمة مع جزيل الشكر للمزارعين
*** انتصار المريخ على الأهلي شندي ما أنساه هزيمته بكوستي ( وتجازي يالرابطة تجازي )
*** الزول ده ما نفعت فيه النصايح .. الزول ده ( ما سمع الكلام ) .. الزول ده شغال خرمجة ولخبطة الزول ده لا عارف بدأ من وين ولا ينتهي وين
*** قام سافر .. عاد سافر .. قام تقدم .. قام رجع .. شخصياً لا أعلم عدد المرات التي سافر فيها مناوي داخل وخارج البلاد وما هي حصيلة سفرياته لكني عرفت أنه عاد أمس من ألمانيا ( عوداً حميداً مستطاب )
*** أجانب الهلال ما شاء الله والصلاة على النبي وعيني باردة تمام التمام ( ومية المية ولي فوق شوية ) .. أجانب الهلال الأقل مستوًى فيهم أفضل مية مرة من أجانب المريخ ( والمغالطون يمتنعون )
*** بتعادلها مع الوادي نيالا .. كسبت أول نقطة لها في الممتاز .. والزومة بدأت ( تنقطت ) وقديماً قالوا ( الرزق تلاقيط )
*** الاتحادي الأصل أصل ( خلافاته ) أنه دخل في ( تحالف ) والتحالف مع مين ؟؟ مع أردول وأصل الحكاية أنها ( ميتة وشبعانة موت )
*** صعب على منافسيه حماية مرماهم أمامه فكل لاعبي الهلال على إحراز الهدف قادرون
( والحكاية ماشة )
*** لو كان أمر الهلال بيدي لبعثت الكابتن نصرالدين الشغيل الذي ترجل إلى أوروبا للتأهيل مدرباً فالشغيل بلا شك ناجح في كل الميادين
*** لا نفذ صبر الثوار ولا نفد البمبان ( والكر والفر ) مستمر ولا أحد يدري الكلام ده
( حدو وين !!)
عبدالمنعم شجرابي ..
