.. أضرب وأهرب
عبدالمنعم شجرابي
*** بارك الله فيكم .. وعليكم وأنتم تترحمون على الموتى وتتمنون الشفاء للجرحى وترجون فك الأسرى أن تتذكروا أن هناك رهائن أخذهم الدعامة من الشوارع ومن بيوتهم باقون في معتقلاته بلا ذنب في واحدة من ( فظائعهم ) وفظائعهم إن تعد لا ( تحصى )
*** الهلال ( اتحزم واتلزم ) الهلال جاهز ( موية ونور ) الهلال ( الشاطر ) لا ينقصه للقاء الجمعة إلا ( درهم الحظ ) ويا درهم الحظ رفقاً بالأسياد يا درهم الحظ ( علك ترضى )
*** كُتّاب الأعمدة اليومية وما كانوا يغيبون يوماً أصبحت أعمدتهم نصف أسبوعية أو أسبوعية أو شهرية وبعضهم اختفى بالكامل
( ليه كده !!؟؟ )
*** الزول ده كلما مشى خطوة يرجع خطوتين
الزول ده كلما اتقدم يرجع ورا
الزول ده زول أمبارح ما زول بكرة
*** وأنا مالي ومال كده ( حلوة شديد ) بصوت العميري ( وحلوة خالص ) عند عباس تلودي وكده كده ( وأنا مالي ومال كده )
*** مجلس المريخ ( بعد الرقعة ) وبقيادة رئيسه الجديد عمر النمير نجح في سداد ديونه التي وصلت طرف الفيفا الخط الأحمر ( ونام في الخط ) تحت شعار
( من حل دينو نامت عينو )
*** في غياب العزيز الأمين عبدالمنعم لظرف طارئ ترافقت والأخوين العزيزين عمر عبدالرحيم أبوبكر وهشام محمد أحمد لزيارة د.كمال شداد بشقته وتسامرنا على مائدة من الماضي والحاضر والمستقبل وليت قناة الزرقاء وثقت للرجل الموسوعة فهل يسمعني الأعزاء مجدي عبدالعزيز وسيف الدين حسن والمهندس أبوشيبة؟؟؟ أثق وأبصم بأصابعي العشرة
*** في خياراته لاختيار حارس مرمى المنتخب الوطني كان الأفضل في تقديري للاتحاد العام اختيار الحارس الهادي سليم بدلاً من اختيار ( ابنه ) أكرم على الأقل الهادي واجه ( مهاجمين صاح ) وهز شباكه وبلا ترتيب العمالقة كسلا وفتاح والدحيش وقاقارين
*** لست ( حزبياً ) وأكره ( التحزب ) وأخاف مطالبة اللا حزبين ( بالتوحد ) ضد الأحزاب فينشأ حزب يضاف إلى ( دقشة الأحزاب ) وتتسع دائرة الفشل
( والبلد ما ناقصة )
..
