الشاعر /عادل بعنيب
لو سمعنابك بتشكى
كان اقلو بندعو ليك
وكان نقول ليك ياحبيبنا
ياخى بعد الشر عليك
لما صوت الريح يوشوش
شوقنا يسبقنا ويجيك
نلقى دانات فى الشوارع
وافتقدنا الفرحة ديك
لا عويناتك .. غشتنا
لا جريدة تجيب نعيك
ولو رجينا العيد يجيبك
مابتجينا … ونشتهيك
لا بترجع بكرة نفرح
ياحبيب العمر بيك
الا مابننساك وحاتك
هاكا عهدى وهات ايديك
غبت يانبع المشاعر
ومافى موعد شوف جديد
كان بنتصبر شوية
الا موتك كان بعيد
كنت فى وجداننا امة
كنت فى الدم فى الوريد
وفى عيون اطفال بتكتب
من حروف اسمك نشيد
شهر عشرة حبابو عشرة
وكان بتهتف للشهيد
مبدأ الحرية أول
عن طريقك مابتحيد
قلنا ماممكن تسافر
وانت عارف … يافريد
مافى عيشة بلاك بتبقى
ومافى نشوة ومافى ريد
الخبر شايلو النسيم
جانا .. كلو شقا وانين
نحنا اتعودنا شوفتك
وكان نلاقيك كل حين
وكنا بنردد معاكا
فى غناك طول السنين
واى زول غيرك نملو
والفرح بعدك حزين
الدقيقة وانت مافى
مرة ياود الامين
وين نلاقى نضارة تانى
والطفولة الفى العينين
لا بنغنى وراكا كلمة
لابنضوق فرح السنين
والشقا الضقناهو بعدك
وين حانهرب منو وين
السنين العاشهم الحب
وبى وجودك طاب سمرنا
كم لهينا وقلنا تانى
ماحانشتاق طول عمرنا
وغبت غاب بعدك فرحنا
بالحنان فيضك غمرنا
مافى غنوة بلاك بتطرب
لابلاك بعشق وترنا
والبلد زادت جراحا
وزاد علينا الضيق فترنا
كنا منتظرين تغنى
لما تلقانا انتصرنا
ولما يسكت صوت سلاحنا
ونبقى فرحانين عبرنا
الا فقدك زاد جراحنا
وماقدرنا وراك صبرنا
والحياة صعبت علينا
وبى اثر فقدك شعرنا
