.. استراحة الجمعة
عبدالمنعم شجرابي
*** عصفوران بحجر واحد قررت اصطيادهما العصفور الأول تهنئتها بعمرة شعبان والعصفور الثاني مباركة رمضان مقدماً .. وكان وان قصدت فاطمة بت أحمد نهار الاثنين والشمس ليست عمودية على ( خط الاستواء ) بقدر ما هي عمودية على رؤوس العباد
*** كعادتي استمتعت من بعيد بباب بيتها المفتوح والمزيرة الحاضنة لدستة من الأزيار والعصافير المبلولة تحتها بالماء وكلب يرقد ( مرطب ) إذا تركته يلهث وإن حملت عليه يلهث
*** تعانقنا وعبرة فرح تخنقني ودمعة تتجمد على عينها ترفض النزول .. بالحمد والشكر كله حمدت وشكرت رب العالمين على كثير من النعم ونعمة العمرة التي أدتها خصصت لها فاصلاً بكل تفاصيله الدينية والدنيوية
*** بدأت بالدعاء .. سايلة ربي يا شدرابي ود خيتي ست الجيل أحضر رمضان وأصومو وأمرق الصواني قدام بيتي في الشارع للجيران .. ووليدات الركشات .. وأسياد الكارو وأي زول ماشي وجاي .. والحمدلله رتبت حالي واتفقت مع النسوان البسون الفطور وبارك الله في وليداتي رسلوا ما خلوا شئ واذكروا البعيد والقريب .. حولوا القروش ودفقوها دفيق للمحتاج وبالمحبة للما محتاج أنا راضية عليهم وعافية منهم رضا وعفو يلقوهو في وليداتم
*** عليك الله يا شدرابي ود خيتي ست الجيل نحنا كنا وين وهسي وين حبوباتنا وجدودنا صاموا في حر يرمي الطير من الشجر وهسي نحنا نكورك الكهربا قطعت والكهربا جات .. عليك الله يا شدرابي شوف الناس الشغالة في الهجيرة
بوليس الحركة وناس النضافة وعمال البنا وكتار زيهم ضلهم ومراوحم ومكيفاتم الشمس
رمضان يقين وبس .. يشلهت فيهو الما عندو يقين .. والايمانو ضعيف .. رمضان رحمة يداوي ويعالج .. يلم الجيران ويقرب البعيد .. نهارو أدب وليلو طيب .. الوجبة منتظمة للكبير .. والصغير يضوق المسكر حلو ولا مسيخ .. والمطبوخ كان داير ملح ولا لا .. ويجي يفطر مع الكبار .. والجارة تدي جارتا من السوتو والماعون المشى ما برجع فاضي
*** سرقني الزمن وبت أحمد تحكي .. وتوصي .. وتحمد وتشكر .. وتتفاءل وترسل الرسائل ( لمن يهمهم الأمر ) في كل إتجاه
*** بت أحمد يا أم يا حنونة يا طيبة يا جميلة ربنا يملأ جوفك صحة وعافية ويديك قدر نيتك ورمضان كريم وجمعة مباركة عليك وعلينا والمسلمين أجمعين
وكل جمعة وانتو طيبين
