بقلم :د. أحمد الطيب إبراهيم
خمسطاشر سنة جمعتني بعمالقة الطب في السودان في مجمع طبي واحد … الرجل المهذب جدا د علي ابوبكر استشاري النساء والتوليد و د بابكر هجا استشاري جراحة الشبكية خالد الطيب استشاري الاطفال و عمر محمود خالد ود السني وعادل سنهوري و هيثم حمد النيل ….كل يوم قبل العيادة بي نص ساعة عندنا قعدة نقاش في داخل الصيدلية نحن بنسميها حوار الأجيال …
اها الليلة ح نكشف ليكم ورق عمر محمود خالد بي الجوكر و دامة الهارت ذاتها .
_ عمر ده بحكي لينا عن نفسه أنه من الله خلقه ما حصل شاكل زول خالص _ و طبعا انا دائما بكون واقف ليه في حلقه ومافي زول غيري برد ليه سألته اها طيب ما حصل شاكلت زول دي عرفناها لو زول شاكلك ح تعمل شنو ؟؟؟
قال لي بمشي اخليه وللا اقول ليه الله يسامحك ….
كيف يعني زول يشاكلك تقول ليه الله يسامحك !!!
يعني عامل فيها الاحنف بن قيس …
_ بعدين الله يسامحه ما يسامحه دي ما شغلتك اي زول يتشاكل معاك رسلوا لينا جوه المجمع لي احمد الطيب وخالد الطيب للاجراء عشان نضقل بيهو … ( شركة اولاد الطيب للإجراءات التعسفية )… _ اها يا اخوانا ده عمر محمود خالد والله كما عرفناه زول تاكل وتقش في طرفه بس طرفي انا و خالد الطيب ممنوع …
_ بتدقا _ ازعل طرشق اتشقا
زول ده والله قمة التسامح و الحلم …
_ مرة انا قاعد مع بروفسور أبو حسن أبو ربنا يرحمه ويغفر له و يدخله الجنة بلا حساب بما قدم و هو يشاهد في برنامج (صحة وعافية ) ومركز شديد قمت قلت ليه اصحي يا بروف هنااااا امدرمان صوت الشعب السوداني … وأشرت لي روحي لمن ابو ذاتو ضحك .. _ قام عاين كده وقال لي ( الود ده لهلوبةفي الاعلام ولد مبدع جدا ) قاصد طبعا عمر محمود ..
قمت قلت ليه طيب وقت عمر ولد انا انا ده اطلع شنو يعني ؟
_ قال لي انت you are implanted ova طبعا ما ح اشرح العبارة دي بالعربي اي زول يفهمها قدر انجليزيهو …. _ اها طبعا القوالات دي مرات بتخليك عرضة للردم المؤسسي لاقيت عمر قلت ليه كلام بروفسور ابو حسن أبو بي ضبانته…ضحك وقال لي يا ولد انت مولود سنة كم ؟؟؟ ابو بقول لي عمر يا ولد و عمر بقول لي انا يا ولد …
_ قلت ليه سنة كده (….. ) طبعا ما ح اكتب ليكم التاريخ عشان ما تحرجونا مع ناس شوقر داد … عمر قام علي حيله و قال لي شفت يا دكتور قصيدة يا ( سيدة لا ) اتولدت قبلك بي سنتين _ بطل مناكفات معاي ومع عمك بروف أبو وهو ماشي علي الباب قلت ليه :
انت يعني الكلام الفارغ ده بتكتب فيه من سنة ألف و تسعمائة وسبعين 1970 !!!!
غايتو الزول ده لو ما فعلا متسامح كان فكاني بي فتيل امبيكلوكس من رف الصيدلية …
عاااااين كده وقال لي المسامح كريم .
_ الليلة زورته في بيته ما شاء الله استعاد صحته و فصاحته و قفشاته الجميلة و قعدت اتونست معاه هو و مدام ناهد زوجته … قلت كدي اشوف عمنا عمر ده كيف قدام المدام ما يطلع لينا لواء ساي . اللواء قالوا بخوف اي زول لكن بخاف من مراته والحمد لله الواحد ما لواء ولا عميد منتظر الترقيات ولا عسكري من اساسه ( مدنياوووو ) ما تشوفوا الدبابير دي بغسلوا العدة عاااااادي .. اول ما المدام ختت لينا البارد في التربيزة وقعدت قلت ليه تعرف يا دكتور عمر اجمل قصيدة كتبتها انت هي بتاعة ( يا سيدة لا ) .. وانا بعاين للمدام بالجنبة ما تقوم تردمني بي كباية الببسي وأنتهي بي أذي جسيم و اورنيك تمانية والعوارات الفارغة ديك .. _ دكتور عمر موش طلع للواء _ ده ما شاء الله طلع فريق اول عديل كده ..لكن النصيحة ما فريق خلاء — لواءات الخلا طبعا حقوق المرأة والطفل ما شغالين بيها _ هم الاطفال والحريم الحرقوهم شوية …
الفريق أول عمر محمود خالد قال لي علي القسم احلا قصائد هي الكتبتها في ناهد زوجتي دي _ و فتح فينا شعر جنس قصائد و كلام دقاق انا ذاتي قلت الدخلني بين قيس وليلي شنو _ قال قصيدة حلم الاماسي و أربعة سنين وخمسة سنين وقرب يقول لي وكمان القصيدة الأخيرة الكتبتها فيها و بدايتها أربعة وأربعين سنة معاك يا زينة الحلوين … بلد كلها لواءات ما شاء الله يا اخوانا البلد أتاريها مهروشة من كبارها . _ كانت لحظات جميلة مع رجل مبدع و زوجته و رفيقة دربه المصون .. رجل اعطي و لم يأخذ من هذه البلد الا انين الذكريات
رجل تمدد في السودان مثل النيل فيضا من الشعر والغناء و عبارات الجميلة و الكلمة الحسنة والطب و العلاقات الاجتماعية . .
في موبايله أكثر من ثلاثمائة مجموعة واتساب حسب اخر مرة حسبتها معاهو يستقبل رسائلهم بصدر رحب و نحن الواحد يضيق صدره بي مجموعة الأسرة ذاتها والأصدقاء و عادي ممكن في خمسة دقائق يطلع من اي قروب في الدنيا دي داخل فيه و يضرب الموبايل في الحائط يكسره و بكرة يشيل ربيكا …
__ عودا حميدا د عمر محمود خالد الي نادي المريخ قريبا و الي مجمع السنهوري الطبي و برنامج صحة وعافية مع تمنياتنا لك بدوام العافية و تمام الصحة التي دائما ما تتمناها الشعب السوداني مع كل فطور جمعة وانت تنشر الوعي الطبي بيننا و تقدم الدعم اللوجستي والطبي للعاجزين عن دفع نفقات العلاج وجبر الله خاطرك وانت تجبر خواطر الآلاف بل الملايين من أبناء الشعب السوداني عبر برنامجك التلفزيوني الخالد صحة وعافية .
و دمت سالما ودام عليك الهناء والسرور
د احمد الطيب إبراهيم
استشاري جراحة الكلي والمسالك البولية
