أضرب وأهرب
عبدالمنعم شجرابي
*** هل يعقل أن تكون كل طلبات الحركات المسلحة ( مستجابة؟؟) هل يعقل أن تكون كلها ( على العين والراس؟؟) وهل يعقل أن تصرف الدولة ( في وجود جيشها ) على هذه الحركات ( بغير حساب؟؟) وللتذكير فالتعامل الحاصل مع الحركات حالياً هو ما كان مع الدعم السريع فأصبح جيشاً يحارب جيش الوطن
*** اللواء عثمان عمليات الذي ظهر بعد الهجوم على جبل أولياء .. واللواء عصام فضيل وكان أول ظهور له بعد دخول الدعامة للعيلفون معرفة مكان وجودهما الآن مهم في سير العمليات
( أليس كذلك؟ )
*** كسب أتليتكو الأنجولي من الهلال أربعة نقاط ( استحق بعضها ) وخسر الهلال أربعة نقاط من النجم الساحلي كان ( الأحق بها ) وبنقاطه من الهلال تأهل الأنجولي وبنقاط الهلال بات النجم ( الضل الوقف ما زاد )
*** البلد دي حقت منو ؟؟
سؤال الإجابة عليه ( ممنوعة ) على قوم يتوهمون ( البلد دي حقتم !! )
والبلد ما حقت زول
*** أسبوع ( بحالو ) بلا تصريح من مبارك الفاضل ( ده مش ممكن !!) فالسياسي العجوز وبعد انتهاء صلاحية عمره السياسي جائز يصعد على ( عمود الكهرباء ) ليقول أنه موجود ووجوده ( أخير عدمو )
*** لا مصنفات فنية .. ولا ملكية فكرية وفي غياب القانون ( ورث ) المقلدون كبار الفنانين ( الأحياء منهم والأموات ) على ( أضانك يا مستمع ) وعاسوا وعاثوا فساداً في الأغاني الخالدة شوهوها ومزقوها وعذبوها
( ولحقوها أمات طه )
*** الزول ده كلامو ياهو كلامو
الزول ده ناسو ياهم ذاتم
الزول ده في حالو لا اتغير ولا اتبدل
الزول ده قولوا ليهو لا يغير الله ما بقوم حتى يغيروا ما بأنفسهم
*** للتنبيه فقط فبينما لعب خصومه أمامه ( بحداشر ) لاعب لعب الهلال كل مبارياته بعشرة فقط لعب الهلال ناقصاً لاعبه الأخطر والأهم لعب بدون جمهوره لاعبه ( رقم واحد )
وهذا ما لزم التنويه
..
