.. مقتطفات الجمعة ..
عبدالمنعم شجرابي .
*** المشاركون في الحرب ضد الشعب السوداني ما أكثرهم فالملاريا شريك ( باسهم ضخمة ) والذباب ببورتسودان ( يشن غاراته ) وسوق الأسهم مفتوح للآخرين كل حسب ( سلاحه ) في حرب لعينة
( والشعب الطيب الله معاه )
*** بالقاهرة سودانيات ( يملن العين )
بالقاهرة سودانيون ( ياكلوا النار )
وديلاك مننا .. وديل نحن
( وياهم ناسنا )
*** بدأ محتلاً ومرتكزاً ومسيطراً على مدن العاصمة المثلثة الثلاثة لينقلب السحر على الساحر ويتحول الدعم السريع من مهاجم إلى مدافع إلى هارب
( والردة مستحيلة )
*** القاهرة لم تعد تكتب .. وبيروت لم تعد تطبع لسبب واحد أن الخرطوم لم تعد تقرأ
( وقلبي ينزف في الدواية )
*** الشوارع واقفة فيها الارتكازات .. والواطة مليانة جيش والحمدلله يا شدرابي ود خيتي ست الجيل بقينا ننوم مطمئنين ونطلع الشارع آمنين
شكراً بت أحمد طمنتونا عليكم ربنا يطمنكم أكتر وأكتر بت أحمد ربنا يصلح الحال ويملأ جوفك صحة وعافية
*** معاملة المصري للسوداني إلى الحد البعيد جيدة وطيبة .. أما معاملة ( مصر الإدارية ) للسودانيين فإنها ( مادية بحتة ) تبدأ بالدولار وتنتهي بالدولار
( والدولار عملة لا ترحم )
*** أجيال ( الخيبة والفشل ) التي أصبحت أجيال ( الحرب العبثية ) التي قضت على الأخضر واليابس يا ترى ماذا سيقول أبطالها للأجيال القادمة؟ ماذا سيقول الجد للوالد وماذا سيقول الوالد للولد
( الحرب مصيبة )
*** أسلمت رأسي لحلاق بصالون فخيم بالقاهرة عمل فيه وتعامل معه بكل لطف .. نهضت وعرفت بعدها أنه مهندس بشركة كبرى بالخرطوم ضحكت واضحكته معي وأنا أقول راسي كان محتاج ( موس حلاقة ) يطلع لي مهندس
( الشغل ما عيب عيب قعاد ساكت )
*** جدودنا زمان وصونا على الوطن
على التراب الغالي ( الما ليهو تمن )
( ونحن لا سمعنا الوصية ولا حاجة )
*** يا رب يا رب بوجهك الكريم وذاتك العلى وبعدد ما خلقت وما أنزلت يا رب يا رب انصر اليوم الهلال وفرح خلقك
( آمين يا رب العالمين )
*** تلاميذ بلا مدارس .. مرضى بلا مشافي .. نازحون بلا مأوى .. جائعون بلا لقمة .. عطشى بلا ماء
هذه تذكرى لمن يهمهم الأمر إن وجودوا فهل هم موجودون ؟؟؟ ماظنش
*** اللهم اغفر لنا واعف عنا وعافنا واشف مرضانا وارحم والدينا وجميع موتانا
جمعة مباركة وكل جمعة وانتو طيبين
.
